Registrator ofisi

Oʻzbekiston davlat jahon tillari universiteti (OʻzDJTU)ning asosiy tarkibiy boʻlinmasi boʻlgan “Registrator ofisi” (keyingi oʻrinlarda – Ofis deb yuritiladi) talabani tizimda shakllantirish, oʻquv jarayoni va talabalarga xizmat koʻrsatish, akademik faoliyatni tashkil etish hamda taʼlim jarayonining ochiqligi va shaffofligini taʼminlash, tizimda byurokratik toʻsiqlar yuzaga kelishini oldini olish va tahliliy maʼlumotlarni shakllantirish, shuningdek, qaror qabul qilish jarayonini optimallashtirish kabi vazifalarni amalga oshiruvchi universitetning tarkibiy tuzilmasi hisoblanadi. Ofisga ofis boshligʻi rahbarlik qiladi.Ofis oʻquv ishlari boʻyicha prorektorga boʻysunadi hamda fakultet, kafedra, oʻquv-uslubiy boshqarma, boʻlinma va boshqa taʼlim tuzilmalari bilan hamkorlikda ishlaydi.

Bo‘lim 2025-yil 1-fevraldan boshlab o‘z faoliyatini boshlagan.

Ofis oʻz faoliyatini Oʻzbekiston Respublikasining Konstitutsiyasi, Oʻzbekiston Respublikasi “Taʼlim toʻgʻrisida”gi Qonuni, Oʻzbekiston Respublikasi Prezidentining Farmon, qaror va farmoyishlari, Oʻzbekiston Respublikasi Vazirlar Mahkamasining qarorlari, Oʻzbekiston Respublikasi Oliy taʼlim, fan va innovatsiyalar vazirligining Hayʼat qarorlari, buyruqlari, Universitet Nizomi, Kengashi qarorlari, OʻzDJTU rektori buyruqlari hamda mazkur Nizomga muvofiq olib boradi.

Registrator ofisi tomonidan taqdim etiladigan xizmat turlari

I. Akademik (oʻquv) faoliyati boʻyicha koʻrsatiladigan xizmatlar:

1. QR kodli diplom shakllantirish;

2. Akademik maʼlumotnoma va transkript berish;

3. Akademik mobillik asosida boshqa oliy taʼlim tashkilotiga ketgan talabalarning hujjatlarini tegishli tartibda rasmiylashtirish;

4. Bitiruvchi talabalar uchun aylanma varaqa yaratish;

5. Diplom dublikatini olish uchun ariza yuborishga koʻmaklashish;

6. Imtihon natijalari boʻyicha apellyatsiya arizalarini qabul qilishni tashkil qilish;

7. Imtihonlar roʻyxatini shakllantirish va talabaga taqdim etish;

8. Oliy taʼlim tashkilotlari talabalariga oʻqishni koʻchirish va qayta tiklash uchun ariza yuborishga koʻmaklashish;

9. Oliy taʼlim tashkilotlariga ikkinchi taʼlimga kirish uchun abituriyentlarga onlayn ariza topshirishiga koʻmaklashish;

10. Oliy taʼlim tashkilotlarining magistratura bosqichiga kirish uchun abituriyentlarga onlayn ariza topshirishiga koʻmaklashish;

11. Oliy taʼlim olganlik haqidagi diplom maʼlumotlarini qoʻshish yoki tahrirlash uchun talabgorlarga ariza yuborishga koʻmaklashish;

12. Stipendiya va turli grant tanlovlarida ishtirok etish uchun ariza qabul qilish;

13. Talabaga oʻzining GPA koʻrsatkichi haqida maʼlumotnoma taqdim etish;

14. Talabalar davomatini amaldagi tartibga asosan sababli va sababsiz holatga oʻtkazish;

15. Talaba uzrli sabablarga ko‘ra (kasal, yaqin qarindoshining betobligi yoki vafoti, tug‘ruq holati kabilar) oraliq va (yoki) yakuniy nazorat turiga kirmagan talabalar uchun tegishli fanlardan shaxsiy grafik yaratish;

16. Talabalar hujjatlarini qabul qilish va arxivga topshirish;

17. Talabalarga imtihon natijalarini taqdim etish;

18. Talabalarga qayta oʻqish uchun ariza berishga koʻmaklashish;

19. Talabalarga turli xil maʼlumotnoma (oʻqish joyidan, harbiy boʻlimdan v.b.)lar berish;

20. Talabalarga oʻquv varaqa taqdim etish;

21. Talabalarga fan resurslari boʻyicha maʼlumot taqdim etish;

22. Talabalarni HEMIS platformasida keyingi kursga oʻtkazish;

23. Talabalarni oʻzlashtirish koʻrsatkichlari haqida maʼlumot taqdim etish; 

24. Talabalarning joriy, oraliq va davomat natijalariga koʻra yakuniy nazoratlarda ishtirok etishiga ruxsat berish;

25. Talabalarning parolini tiklash;

26. Talabalarning tyutorlar tomonidan to‘g‘ri to‘ldirilgan shaxsiy hamda oʻquv maʼlumotlarini tahrirlash;

27. Talabalik guvohnomasini tayyorlash va talabalarga taqdim etish;

28. Talabani bir guruhdan ikkinchi guruhga koʻchirib oʻtkazish;

29. Tashqi xizmatlar: Ijtimoiy himoya reyestri va ayollar daftarida turuvchi talabalar yagona reestri bazasidan sinxronizatsiya qilib roʻyxat shakllantirish;

30. Oʻqishini koʻchirishga tavsiya etilgan, o‘qishga tiklangan yoki kursda qolgan talabalarning o‘quv rejalaridagi fanlar farqini aniqlash;

31. Oʻquv dasturlari haqida maʼlumot berish.

II. Yoshlar masalalari va maʼnaviy-maʼrifiy faoliyat boʻyicha koʻrsatiladigan xizmatlar:

32. Talabalarga yotoqxonalarga joylashish uchun ariza berishga koʻmaklashish;

33. Ijara subsidiyasi uchun ariza yozishga koʻmaklashish.  

III. Xalqaro aloqalar faoliyati boʻyicha koʻrsatiladigan xizmatlar:

34. Talabalarga oʻqish joyidan ingliz tilida maʼlumotnoma berish;

35. Turli xalqaro grantlar va akademik mobillik dasturlari boʻyicha maʼlumotlarni taqdim etish;

36. Oʻqishga qabul qilingan xorijlik talabalarni elektron tizimda roʻyxatga olish va fanlarga biriktirish;

37. Xorijiy oliygohlarda tahsil olishda konsultatsiya berish;

38. Xorijlik talabalar uchun viza xizmatlarini amalga oshirish;

39. Xorijlik talabalarga toʻlov-shartnomalarini taqdim etish;

40. Xorijlik talabalarni Oʻzbekiston Respublikasida vaqtinchalik roʻyxatga qoʻyish xizmatlarini amalga oshirish;

41. Xorijlik talabalarni oʻqishga qabul qilish boʻyicha konsultatsiya berish, ariza va talab etiladigan hujjatlarni koʻrib chiqish uchun qabul qilish;

IV. Buxgalteriya va marketing boʻyicha koʻrsatiladigan xizmatlar:

42. Qayta oʻqishga shartnoma berish;

43. Stipendiya toʻgʻrisida maʼlumotnoma berish;

44. Hisob varagʻini shakllantirib berish;

45. Talabalarga toʻlov-shartnomasi olish uchun ariza berishga koʻmaklashish;

46. Talabaning yotoqxonalarga joylashish shartnomasi boʻyicha qarzdorligi va haqdorligi haqida maʼlumot berish;

47. Talabaning qayta oʻqish shartnomasi boʻyicha qarzdorligi va haqdorligi haqida maʼlumot berish;

48. Talabaning toʻlov-shartnomasi boʻyicha qarzdorligi va haqdorligi haqida maʼlumot berish;

49. Toʻlov-shartnoma summasi haqida maʼlumot berish;

50. Bitiruvchi talabalarga boʻlgʻusi ish oʻrni toʻgʻrisida kengroq axborotlar berish, mehnat yarmarkalarni oʻtkazishga koʻmaklashish.

V. Ilmiy faoliyat boʻyicha koʻrsatiladigan xizmatlar:

51. Grantlar va tanlovlar haqida maʼlumot berish;

52. Ilmiy konferensiyalar haqida maʼlumot berish;

53. Innovatsion gʻoya va startaplarni roʻyxatdan oʻtkazishga koʻmaklashish;

54. Nomdor stipendiyalar haqida maʼlumot berish;

55. Ilmiy loyihalar toʻgʻrisida konsultatsiya berish;

56. Ustoz-shogird maktabiga aʼzo boʻlishga koʻmaklashish.

VI. Koʻrsatilishi zarur boʻlgan boshqa qoʻshimcha xizmatlar:

57. Talabalarga tibbiy sugʻurta olish uchun yordam berish;

58. Oʻqishga qabul va oʻqishni koʻchirish yuzasidan konsultatsiya berish;

59. Talabalarga ishga joylashish borasida tavsiyalar berish;

60. Talabalarga OTTda mavjud turli xizmatlar va resurslar haqida maʼlumot berish.

VII. “Registrator ofisi”ning huquqlari va majburiyatlari

“Registrator ofisi” oʻz funksiyalarini bajarishda quyidagi huquqlarga ega:

davlat taʼlim standartlari, oʻquv rejalari va fanlar dasturlari yangilanayotganda ushbu meʼyoriy hujjatlar loyihalarini tayyorlashda ishtirok etish;

 har oʻquv yilida kafedralar va oʻquv-uslubiy boshqarmaga ishchi oʻquv rejalari hamda fanlarning oʻquv va ishchi oʻquv dasturlarini tayyorlashda ishtirok etish;

 fakultetlar va kafedralardan ishchi oʻquv rejalari, fanlarning ishchi dasturlari, professor-oʻqituvchilarning shaxsiy ish rejalarini soʻrab olish;

 tayyorlanayotgan meʼyoriy va boshqa hujjatlar boʻyicha kafedralardan ushbu hujjatlar loyihalariga takliflar va tavsiyalar soʻrab olish;

 kafedralarda tayyorlanayotgan darslik va oʻquv qoʻllanmalari hamda boshqa turdagi akademik materiallar toʻgʻrisidagi maʼlumotlarni soʻrab olish;

 dekanatlar, kafedralar va barcha boʻlimlardan universitet jarayoni bilan bogʻliq boʻlgan boshqa hujjatlar va maʼlumotlarni rasman olishi;

 “Registrator ofisi” amaldagi qonunchilikka muvofiq boshqa huquqlarga ham ega boʻlishi;

 “Registrator ofisi” vakolatiga kiradigan masalalarni muhokama qilish boʻyicha yigʻilishlar oʻtkazish hamda seminarlar tashkil etishi mumkin.

VIII. “Registrator ofisi”ning oʻz funksiyalarini bajarishdagi majburiyatlari:

 Oʻzbekiston Respublikasi Oliy Majlis Senati, Qonunchilik palatasi, Oʻzbekiston Respublikasi Prezidenti, Hukumat va vazirlik topshiriqlarini oʻz vaqtida va sifatli bajarish;

 “Registrator ofisi”ga yuklangan vazifa va funksiyalarni samarali tashkil etish;

 jismoniy va yuridik shaxslar murojaatlarini oʻz vaqtida kо‘rib chiqish;

 meʼyoriy hujjatlar loyihalarini (loyihalarga takliflarni) sifatli va oʻz vaqtida tayyorlash hamda rahbariyatga taqdim etish;

 oliy taʼlim tashkilotida oʻquv jarayonini tasdiqlangan davlat taʼlim standartlari asosida tashkil qilish, ushbu jarayonga huquqiy-meʼyoriy va boshqa hujjatlarning toʻla joriy etilishini ta’minlash.